ЗАМБУРУҒЛИ КАСАЛЛИК ҲАҚИДА

Замбуруғли касаллик (вагинал кандидоз) – аёллар жинсий аъзоларининг кенг тарқалган касаллиги. Замбуруғли касалликнинг кўпчилик аёлларга таниш ёқимсиз белгилари – творогсимон ёки қуюқ қаймоқсимон оқ рангли ажралмалар (касаллик номи ҳам шундан), вагинал қичишиш, ачишиш, ноқулайлик ҳисси.

Замбуруғли касалликнинг илмий номи – вагинал кандидоз (ёқимсиз белгиларни юзага келтирувчи Candida туридаги микроскопик замбуруғнинг лотин тилидаги номидан келиб чиккан).

Вагинал кандидоз жинсий йўл билан юқадиган касаллик эмас.

Candida замбуруғлари оз миқдорда аёллар организмида (терида, оғизда, ичакларда, жинсий йўлларда) ҳар доим бўлади, кандидоз билан касалланиш эса ҳар доим ҳам юзага келмайди – одатда бирор-бир қўзғатувчи омиллар мана шу замбуруғларни жуда тез кўпайишига сабаб бўлиши мумкин, айнан улар қиннинг меъёрий микрофлорасини бузади.

Замбуруғли касалликни юзага келтирувчи эҳтимолий омиллар:

Антибиотиклар, орал контрацептивлар, кортикостереоидлар, цитостатикларни қабул қилиш;
Организмнинг ҳимоя кучларини заифлаштирувчи касалликлар (эндокринологик, ўткир ва сурункали респиратор, жароҳатлар, операциялар ва ҳ.к.);
Гигиеник омиллар (синтетик матолардан тикилган ички кийимлар кийиш, жуда тор кийимлар (жинси, стринглар), гигиеник тагликлардан фойдаланиш, гигиенага риоя этмаслик);
иссиқ иқлим ва чот оралиғи соҳасида иссиқ ва нам муҳитни юзага келтирувчи бошқа ҳар қандай омиллар;
Чекиш, кучли стресс, аллергик реакцияларга мойиллик.

Замбуруғли касаллик қандай белгиларга эга?

Одатда аёлларда замбуруғли касалликнинг қуйидаги белгилари кузатилади:

чот орасида ачишиш ва қичишиш;
қиндан оқ творогсимон ажралмалар;
қин ва вульва соҳасида қизариш ва шишлар;
жинсий яқинлик ва пешоб чиқаришда оғриқлардан шикоятлар.

Эпизодларнинг частотасига кўра ўткир (бир йилда 1-3 марта ёки камроқ) ва қайталанувчи (бир йилда 4 марта ва ундан кўпроқ такрорланадиган) вульвовагинал кандидозни ажратиш мумкин.

Замбуруғли касалликни даволаш керакми?

Албатта, керак! Ахир бу касаллик даволанмаса ҳаёт сифатини сезиларли тарзда пасайтиради. Шунингдек, ўз вақтида ва тўғри даволанган вагинал кандидоз замбуруғли касалликнинг қайталаниш ҳолатлари юзага келишининг олдини олади.

Шуни ҳам эътиборга олиш жоизки, замбуруғли касалликнинг белгилари сийдик-таносил тизимининг бошқа касалликлари белгисига ҳам ўхшаши мумкин. Даволашни бошлашдан аввал, Сиз ўзингизда айнан замбуруғли касаллик эканига 100 фоиз ишонч ҳосил қилишингиз керак. Тўғри ташхисни фақат шифокор қўя олади, шундай экан, диагностик текширувлар ўтказиш ва шикоятларингизнинг асл сабабчисини аниқлаш учун белгилар юзага келиши билан ўз гинеколог шифокорингизга учрашинг.