ЗАМБУРУҒЛИ КАСАЛЛИК ҲАҚИДА

Замбуруғли касаллик (вагинал кандидоз) – бу аёл жинсий аъзоларининг кенг тарқалган касаллигидир. Кўпгина аёлларга молочницанинг ёқимсиз белгилари таниш: творогсимон ёки қуюқ қаймоқсимон оқ рангдаги ажралмалар, қинда қичишиш, ачишиш ва ноқулайлик ҳисси.

Замбуруғли касалликнинг илмий номи – вагинал кандидоз (бу ёқимсиз аломатларни келтириб чиқарувчи Candida туркумига мансуб микроскопик замбуруғнинг лотинча номидан олинган).

Вагинал кандидоз жинсий йўл билан юқувчи касаллик ҳисобланмайди.

Candida замбуруғларининг оз миқдори доимий равишда аёл организмида (терида, оғизда, ичакда ва жинсий йўлларда) мавжуд бўлади. Бироқ кандидоз касаллиги ҳар доим ҳам юзага келавермайди – одатда у турли қўзғатувчи омиллар таъсирида ушбу замбуруғларнинг кескин кўпайиб кетиши ва қиннинг нормал микрофлорасини сиқиб чиқариши натижасида ривожланади.

Замбуруғли касаллик келишига ёрдам берувчи эҳтимолий омиллар:

антибиотиклар, оғиз орқали қабул қилинадиган контрацептивлар, кортикостероидлар, цитостатикларни қабул қилиш;
организмнинг ҳимоя қобилиятини заифлаштирадиган касалликлар (эндокрин, ўткир ва сурункали респиратор касалликлар, жароҳатлар, операциялар ва ҳ.к.);
гигиеник омиллар (синтетик матодан тайёрланган ички кийимлар, тор кийимлар (жинлар, стринглар) кийиш, гигиеник прокладкалардан фойдаланиш, гигиенага риоя қилмаслик);
иссиқ иқлим ва оралиқ соҳасида иссиқ ҳамда нам муҳит пайдо бўлишига ёрдам берувчи ҳар қanday омиллар;
чекиш, кучли стресслар, аллергик реакцияларга мойиллик.

Замбуруғли касалликнинг белгилари қандай?

Одатда, аёлларда замбуруғли касалликнинг қуйидаги белгилари кузатилади:

оралиқ соҳасида ачишиш ва қичишиш;
қиндан оқ рангли, творогсимон ажралмалар келиши;
қин ва вулва соҳасида қизариш ҳамда шиш;
жинсий алоқа ва пешоб чиқариш пайтидаги оғриқлардан шикоятлар.

Касалликнинг такрорланиш частотасига кўра ўткир (йилига 1–3 марта ёки ундан кам) ва рецидивланувчи (йилига 4 марта ва ундан кўп) вульвовагинал кандидоз турлари фарқланади.

Замбуруғли касалликни даволаш керакми?

Албатта, даволаш керак! Зеро, даволаш чоралари кўрилмаса, бу касаллик ҳаёт сифатини сезиларли даражада пасайтириши мумкин. Бундан ташқари, ўз вақтида ва тўғри даволанган вагинал кандидоз замбуруғли касалликнинг қайталаниши (рецидивлари) олдини олади.

Шуни ёдда тутиш керакки, замбуруғли касаллик белгилари сийдик-таносил тизимининг бошқа баъзи касалликлари белгиларига ўхшаш бўлиши мумкин. Даволанишни бошлашдан аввал сизда айнан замбуруғли касаллик эканлигига 100% ишонч ҳосил қилиш жуда муҳимдир. Тўғри ташхисни фақат шифокор қўйиши мумкин, шунинг учун касаллик белгилари пайдо бўлганда, диагностик текширувдан ўтиш ва шикоятларингизнинг асл сабабини аниқлаш учун албатта гинекологингизга мурожаат қилинг.